Lekala la tikoloho le meru ka morero oa tsosoloso ea tikoloho le bophelo ROLL, le nehelane ka lisebelisoa tsa tlhokomelo ea tikoloho Thota-Peli Berea maobane.

Puisanong le raliphatlalatso oa ROLL monghali Ts’ita Ts’ita, o hlalositse hore thepa e fanoe ele ho khahlametsa lihli Sechaba mesebetsing ea ho ntlafatsa tikoloho eo se e etsang metseng ea sona.

A re hara tse ling, Sechaba se fothola lihalahala le cheche, se ahe metseletsele le mankorota ho latela se hlokoang ho etsoa ho ntlafatsa tikoloho. A re morero o rekile lisebelisoa tse ka holimo ho likete tse robong, ho li abela lihlopha tsa ntlafatso ea lihloliloeng metseng, ‘me li tla ajoa hohle moo morero o sebetsang e leng Botha-Bothe, Leribe, Berea, Thaba-Tseka, Qacha’s Nek le Quthing. Lisebelisoa tse fanoeng li kenyeletsa likharafu, lipeke, likiribae le literata tse ts’elang majoe ho thibela khoholeho ea mobu.